10 инвалидски колички и 10 помагала на тркалца за граѓаните на Виница

Здравствениот дом Виница информира дека денеска е примена значајна донација од 10 инвалидски колички и 10 помагала на тркалца (ролатори) наменети за лица со намалена подвижност. Средствата се обезбедени од г-дин Сафет Алили, кој живее и работи во Луксембург, и неговата хуманитарна организација LetzCare. Со оваа донација, установата ја проширува можноста за поддршка на пациентите и граѓаните на општината што имаат потреба од ваков тип помагала. Помагалата ќе бидат достапни на привремено изнајмување, со цел да им се помогне на што повеќе лица во периодот кога им е најпотребно.

Граѓаните кои имаат потреба од инвалидска количка или ролатор се охрабруваат да го контактираат Здравствениот дом Виница за информации за постапката на доделување и термин за преземање. Доставата ќе се врши транспарентно, со предност согласно медицинска препорака и реалната итност на потребата. Здравствениот дом упатува искрена благодарност до г-дин Сафет Алили и организацијата LetzCare за нивната хуманост и континуирана грижа за заедницата. Оваа поддршка претставува значаен чекор кон подобрување на квалитетот на живот на лицата со ограничена подвижност и поттик за понатамошна општествена солидарност. За повеќе информации околу условите, потребната документација и преземањето на помагалата, заинтересираните може да се обратат директно до Здравствениот дом Виница во работно време.